1Ti 6 | PONPDN | STEP | LADU kan karos en wauneki melel ar saumas akan, pwe mar en Kot o lamalam der lalauela.

1 Timothy 6

1 LADU kan karos en wauneki melel ar saumas akan, pwe mar en Kot o lamalam der lalauela. 2 A irail me ar saumas akan kin poson ren der mamale kin ir aki ar saulan, a mak eta ren peiki on irail, pweki ar lelapok o kompokelar. Mepukat padapadakiki o panauiki. 3 A ma amen kin wia eu padak toror, o a sota pan dadaurata masan mau en atail Kaun Iesus Kristus o lamalam, me kon on Kot, 4 Nan a aklapalap o sota weweki meakot, a somauki akamai o lokaia sued, me kin kareda peirin, kapei lokaia, lalaue, o karaune mal. 5 O son en akamai en aramas akan, me kin suedela ni lol arail, re liki san melel, re kiki on, me pai ren Kot pan kareda kapwa. 6 A pai ren Kot o lolapot, iei me pai kasampwalia. 7 Pwe sota, me kitail wa don sappa a sansal, me kitail pil sota pan wawei san meakot. 8 A ma kan atail kisin mana o at Iikau mia, kitail en insenemauki. 9 A irail, me inon ion kapwapwala, pan lodi on soneson, o kotauepa kan, o inon sued, o kamatok, me kakirdilan aramas akan, wasan kamekam o sued. 10 Pwe limpok on moni me tapin son sued karos, me akai inon ion, rap salonala san poson o kare on pein irail kamadak toto. 11 A koe aramas en Kot amen, tan wei san mepukat, a inon ion me pun o pai ren Kot, poson, limpok, kanonama, opampap en Nen. 12 Wiada pai mau en poson, aneki maur soutuk, me koe pil peaker on o kadededa kadede mau o mon saunkadede toto. 13 I kakaliki on uk mon Kot, me kotin kamaureda meakaros o mon Kristus Iesus, me kotin kadededa mon Pontius Pilatus kadede mau o. 14 Koe en kanikid kusoned, o so samin, o so sapun, lao en atail Kaun Iesus Kristus a kotin pwarado, 15 Me Kaun iasanai pan kasansaleda ni a ansau, iei Nanmarki en nanmarki kan o Kaun en kaun akan, 16 Pwe i eta ieias soutuk, me kotikot nan marain, me sota meamen kak on, me sota aramas kilaner, o so kak kilan, i en waunla manaman soutuk! Amen. 17 Koe en kapun on me kapwapwaki dipisou en sappa et, me re der aklapalap o pil der kaporoporeki kapwa somelel, a Kot, me kupurai on kitail sapan meakan karos, pwe kitail en paie kida. 18 Irail en dadaureta ni arail wiawia mau kan, o ren rokekila dok mau kan, o nek pasan, o sapan men sauasa. 19 Wiawia on pein irail pason mau eu o ki pena on ansau kokodo pwe irail en konodi maur melel. 20 O Timoteus, pereki pai, me panalan re om, ni om liki san poupou mal kai o padak likam en me aklolekon. 21 Me akai lodi on ap salonala san poson. Mak o en me re om!